ကိုယ်ချင်းစာစိတ်
ကျွန်တော်ကြုံဖူးတာလေးတွေ ပြောပြပါရစေ။ ကျွန်တော် လက်ဖက်ရည်ဆိုင် တဆိုင်မှာ မုန့်ထိုင်စားနေတုန်း တောင်းရမ်းတဲ့ ကလေးတစ်ယာက် လာတောင်းတယ်။ ကလေးခင်မျာ လာတောင်းနေပုံက အလွန်ကို တုန်ရီနေပါတယ်။ ပြီးတော့ သူ့တကိုယ်လုံး စုတ်ပြတ်နေတာပါပဲ။ အချိန်က ၁၂နာရီ တော်တော်ကျော်နေပါပြီ။ အမှန်အတိုင်းပြောရရင် အဲဒိနေ့က ကျွန်တော့်မှာ ဆိုင်က စားစရာမုန့်တပွဲ နဲ့ အအေးတလုံးဖိုး အပြင်ပိုမပါတော့ပါဘူး။ အအေးက မှာပြီးနေပြီ။ ဒီကလေးကိုကြည့်ရတာ အတော်ဆာလောင်နေပုံရတယ်။ သူ့ကို ကျွန်တော်ကြည့်ပြီး ကျွန်တော့် ၀မ်းကွဲညီငယ်လေး လောက်ပဲရှိတာ တွေ့တော့ ကျွန်တော့် ရင်ထဲဆို့နင့်သွားတယ်ဗျာ။ ကျွန်တော်စားမယ့် မုန့်ပွဲကို ငေးကြည့်နေရှာတယ်။
သူ့ခင်မျာ ပိုက်ဆံထက် အခုချိန်မှာစားစရာကို ပိုပြီး မွတ်သိပ်နေပုံပါပဲ။ ဒါနဲ့.. ညီလေးမင်းတော်တော်ဗိုက်ဆာနေလားဆိုတော့ မျက်နှာငယ်လေးနဲ့ ခေါင်းညိတ်ရှာတယ်။ ကျွန်တော်လေ မုန့်ပန်းကန်ထဲက မုန့်တွေ အကုန်နှိုက်ပြီး ရော့ ညီလေး အကုန်ယူသွားပြီး ဗိုက်ဝအောင် စားဆိုတော့ သူ့လက်ခုပ်လေးနဲ့ ယူပြီး ကျွန်တော့်ကို ပြုံးပြတယ်။ သွားကလေးတွေ ကျိုးတိုးကျဲတဲ ဖြစ်နေတဲ့ အဲဒိကလေးရဲ့ အပြုံးလေးဟာ ကျွန်တော့်ကို ရှိန်းကနဲ ဖြစ်သွားစေတယ်။ မုန့်တွေကို အငမ်းမရစားပြီး ထွက်သွားတဲ့ သူ့ကျောပြင်လေးကို ခပ်လှမ်းလှမ်း အထိ လိုက်ငေးနေမိတယ်။ ကျွန်တော် အအေးမသောက်နိုင်တော့ပဲ ပိုက်ဆံရှင်းလိုက်တယ်။ အိမ်ပြန်ဖို့ စရိတ်ပဲကျန်တော့တယ်။ ဒါပေမယ့် ကျွန်တော်ပျော်တယ်။ ကျွန်တော့်လုပ်ရပ်အတွက် ကလေးတစ်ယောက် တဒင်္ဂ ဗိုက်ဝသွားစေတဲ့ အတွက် ကျွန်တော် ဗိုက်တောင် မဆာလောင်တော့ သလိုပါပဲ။ ဒီလိုအမြဲတမ်း မဟုတ်ပေမယ့် ကျွန်တော် တတ်စွမ်းသလောက် ကူညီပေးပါတယ်။ ပရဟိတ လုပ်ရအောင်လဲ ကျွန်တော် အချိန်မပေးနိုင်သေးတော့ ကျွန်တော်တတ်နိုင်သလောက် ပေါ့။ ကူညီတယ်ဆိုတာ ဆင်းရဲနေတဲ့သူတွေအပြင် တကယ်တမ်း အကူအညီလိုနေသူတွေ ကျွန်တော်တို့ အနီးအနားမှာ ရှိပါသေးတယ်။
ပြီးခဲ့တဲ့ အပတ်က အကြောင်းပါ။ ဘာမှတော့ မဟုတ်ပါဘူး။ ကျွန်တော်တက်နေတဲ့ကျောင်းက private ကွန်ပြူတာကျောင်း။ အဲဒိနေ့ကကျောင်းဆင်းတော့ ညနေစောင်းနေပြီဆိုတော့ ဆရာဆရာမတွေ ကျောင်းဝန်ထမ်းတွေကော ပြန်ကုန်ပြီ။ ညနေပိုင်း အချိန်အထိ တက်လိုက်ရတော့ လူလဲ တော်တော် နုံးသွားတယ်။ အတန်းထဲက လူတွေလဲ ပြန်ကုန်ကြပြီ။ နောက်ဆုံး ကျွန်တော်နဲ့ ခင်တဲ့ ရုံးဝန်ထမ်းလေး တံခါးပိတ်တာကို စောင့်ရင်း အတူတူပြန်ဖို့ လုပ်တော့ ကျွန်တော်တို့ အတန်းထဲက ကောင်မလေးက ကားလမ်းမ ဖလက်ဖောင်းနားမှာ တစ်ယောက်ထဲ။ မှောင်ကလဲ မှောင်နေပြီ။ ကျွန်တော်တို့ ဘက်ကို လှည့်ကြည့်ကြည့်နဲ့လေ။ ကျောင်းက လမ်းမဘေးမှာ ဆိုပေမယ့် ကားကျောသိပ် မပြတ်လှပေမယ့် လူသွားလူလာတော့ အတော် ပြတ်တယ်။ ကျွန်တော် အိမ်မြန်မြန်ပြန်ချင်ပေမယ့် အဲဒိကောင်မလေးကို တွေ့တော့ ကိုယ်ပိုင် အသိစိတ်နဲ့ သူ့အိမ်က လာကြိုတာကို စောင့်နေပေးဖို့ ဆုံးဖြတ်လိုက်တယ်။ ကောင်မလေးက သူ့ဟာသူ ခပ်လှမ်းလှမ်းမှာစောင့်နေတာပါ။ ပြီးတော့ သိပ်မခင်ပေမယ့် ကျွန်တော်တို့ အတန်းထဲက အတန်းဖော်ပဲလေ။ ဒီတိုင်းထားခဲ့ရင် မိန်းကလေး တစ်ယောက်ထဲ မသင့်တော်ဘူးလို့ ကျွန်တော်ယူဆမိလို့ စောင့်နေပေးလိုက်တယ်။
ဒါကို ရုံးဝန်ထမ်းလေးက သဘောမပေါက်ဘူး။ကျွန်တော့်ကို ကြောင်ချင်လို့ စောင့်နေတယ်လို့ အထင်လွဲသွားသေးတယ်။ ပြီးမှ ကျွန်တော်က မင်းလဲမပြန်နဲ့အုံးကွာ ပြီးမှ ငါနဲ့ အတူတူပြန်ဆိုပြီး ခပ်လှမ်းလှမ်းက ကျောင်းလှေခါးထစ်လေးပေါ်မှာ ထိုင်နေလိုက်တယ်။ ကျွန်တော် သူ့ကို ရှင်းပြရတယ်။
`မဟုတ်ဘူးကွာ ဒီနေရာမှာ မင်းအစ်မ ညီမလေး သာဆို လူပြတ်တဲ့ နေရာမှာ တစ်ယောက်ထဲ ထားခဲ့မလား၊ အမှန်ဆို ငါလဲ ပြန်ရင် အနေသာကြီးပဲ။ ငါနဲ့ သိပ်ခင်တာလဲ မဟုတ်ဘူး။ အေးဆေးပြန်သွားလို့ ရတာပဲ။ အဲဒါ တာဝန်သိစိတ်ကွ။ ဘယ်သူမှတော့ ငါ့ကို ဒါလုပ်ပါလို့ သတ်မှတ် မထားဘူး။ ကိုယ်ချင်းစာစိတ်လေ။ ဟော ငါကြောင်ချင်လို့ ဇာတ်လမ်းရှာချင်လို့ ဆိုရင် မင်းပြန်သွား ပိုတောင် ကောင်းသေးတယ်လို့ တွက်မှာပေါ့။ ငါတစ်ယောက်ထဲ အေးအေးဆေးဆေး ပြောလို့ရတာပေါ့။ အခုဟာက ဘယ်မှာလဲ ဟိုမှာ သူ့ဟာ သူရပ်စောင့်နေတာ ငါလဲ သူ့သွားစကားပြောတာ မဟုတ်ဘူး။ ငါတို့ ရှိသေးတယ် ဆိုရုံလောက်ပဲလေ။ ငါတို့ လုပ်ပေးနိုင်တာ သူ့အိမ်က ကားလာတဲ့ အထိ စောင့်ပေးရုံပဲ။ ဒါပဲ။ ဒါ့အပြင် ဘာမှ မျှော်ကိုးလိုလို့ မဟုတ်ဘူး။´ လို့ ရှင်းပြလိုက်တော့မှ သူလဲလက်ခံ သဘောပေါက်သွားတယ်။ ၁၀ မိနစ်လောက်ကြာတော့ အဲဒိကောင်မလေးအိမ်က လာခေါ်သွားတယ်။ ကျေးဇူးတင်ကြောင်းလဲ လာကြိုတဲ့ အန်တီကြီးက ပြောသွားသေးတယ်။
ကူညီတယ် ဆိုတာ လူတစ်ယောက် တကယ်လိုအပ်နေတဲ့ အချိန်မှာ တာဝန်သိသိ ကူညီတတ်ဖို့ပါပဲ။ ဘာအကျိုးမှ မျှော်ကိုး ဖို့ မဟုတ်ပါဘူး။ ကိုယ့်ကူညီမှုဟာ မြင်သာထင်သာ လူသိအောင် ကူညီမှ ကူညီတာမဟုတ်ပါဘူး။ လူမသိပေမယ့် ကိုယ့်စိတ်ထဲက သန့်ရှင်းစွာ ကူညီတတ်ဖို့ပါပဲ။ များတာ၊နဲတာ လူသိချင်မှ သိမယ်။ ဒါပေမယ့် ကျွန်တော်တို့ ဟာ ကျွန်တော်တို့ သိနေမယ် ကိုယ့်ရဲ့ ကိုယ်ချင်းစာ စိတ်နဲ့ ကူညီမှုဟာ တပါးသူပေါ် အကျိုးသက်ရောက် မှု ရှိသွားရင် ကျေနပ်စရာ ပဲမဟုတ်လား။ အများကြီးမဟုတ်ပါဘူး။ ကိုယ်တတ်နိုင်သလောက် မွန်မြတ်မှုနဲ့ ကိုယ်ချင်းစာ တရားလေး ရှေ့ထားပြီး ကူညီပေးခြင်းဟာ ကိုယ်နေထိုင်တဲ့ အဖွဲ့အစည်း ၀န်းကျင်ရဲ့တာဝန်ကို တစိတ်တပိုင်း ထမ်းဆောင်ပေးခြင်း ပဲဖြစ်ပါတယ်။
ဤဘလော့မှ စာသားများ၊ ရုပ်ပုံများအား စီးပွားရေး ဆိုင်ရာ လုပ်ငန်းများတွင် ကူးယူသုံးစွဲခြင်းမပြုလုပ်ပါရန် (အထူး) သတိပေး တားမြစ်အပ်ပါသည်။
0 Response to "ကိုယ်ချင်းစာစိတ်"
Post a Comment