twitter
    Find out what I'm doing, Follow Me :)
Barcamp Yangon
Showing posts with label Why do I blog?. Show all posts
Showing posts with label Why do I blog?. Show all posts

မင်းယွန်းသစ်ကိုသိလား

Posted in Labels: , , | Monday, December 29, 2008

ကျွန်တော် ဘလော့ရေးတဲ့သက်တမ်းဟာ တနှစ်နဲ့ ၉လ သက်တမ်းရှိလာခဲ့ပါပြီ။ ဒီသက်တမ်း အတွင်း ကျွန်တော်နဲ့ အတူတူ ဘလော့စဦး ထဲက တူတူရေးခဲ့ကြတဲ့ သူတွေလဲ ရှိကြသလို ကျောခိုင်းနှုတ်ဆက်သွား သူတွေလဲ ရှိကြပါတယ်။ ကျွန်တော်တို့ကတော့ အခုထိ လိမ်ဖယ်ဖယ် ကိုယ်ယုံကြည်ရာ ရေးနေဆဲ။ အမှန်အတိုင်းဝန်ခံရရင် ကျွန်တော့်ဘလော့က ဇော်ကန့်လန့် ဘလော့တခု လို့ ပြောရမယ်ထင်တယ်။ ဘာဖြစ်လို့လဲဆိုတော့ ကျွန်တော်က ဖီလင်လာရင် ၀တ္ထုတွေ ထရေး၊ ကဗျာတွေ ထရေး ပြီးရင်၊ ခရီးသွားရင်လဲ ခရီးသွားမှတ်တမ်း၊ ဒါမှမဟုတ် ပြုလုပ်ဖြစ်တဲ့ ပွဲတွေ အကြောင်း သတင်းမှတ်တမ်း ရေးရင်ရေး၊ ကိုယ်တွေ့အကြောင်း နည်းနည်းပါးပါးရေး၊ စိတ်ကူးပေါက်ရင် ဆောင်းပါးတွေထရေး စသည်ဖြင့် ကျွန်တော်က ကျွန်တော်စိတ်ထင်ရာတွေသာ ရေးနေခြင်းသာ ဖြစ်ပါတယ်။ ဒါကြောင့် ကျွန်တော့် ဘလော့ဟာ အနုပညာ သီးသန့်တင်ပြတဲ့ ဘလော့လဲ မဟုတ်၊ သတင်းမှတ်တမ်း ဘလော့လဲ မဟုတ်၊ ကိုယ်ပိုင်ဒိုင်ယာရီ ဘလော့လဲ မကျ၊ ဖျော်ဖြေရေး ဘလော့လဲ မဟုတ်နဲ့ စုံစီနဖာ တိုလီမုတ်စ ဘလော့တခု သာ ဖြစ်ပါတယ်။

ပြီးတော့ ကျွန်တော့ ဘလော့ဟာ pop ဘလော့တခုလဲ မဟုတ်ပါဘူး။ ကျွန်တော့်ဘလော့ဟာ ပုံမှန်အားဖြင့် တနေ့ပျှမ်းမျှ လူ၅၀ လောက်သာ ၀င်တဲ့ သာမန် ဘလော့တခု သာဖြစ်ပါတယ်။ ဒါက ကိန်းဂဏန်းအရ ပြောတာဖြစ်ပြီး ဒီ၅၀ လောက်ဟာ ပုံမှန်အမြဲလာဖတ်တယ်လို့ ယူဆရပါတယ်။ ဒါကြောင့် ကျွန်တော်ဘလော့ရဲ့ Hit counter ဟာ ပုံမှန် တည်တည်ငြိမ်ငြိမ် အနေထားမှာ ရှိပါတယ်။ ၀ုန်းကနဲ တက်သွားခြင်း ကျသွားခြင်းတော့ မရှိဘူးလို့ ပြောနိုင်ပါတယ်။ နောက်တခု ကျွန်တော် မတတ်နိုင်တာ တခုက ကျွန်တော် ဘလော့တွေ အများကြီးကို လိုက်မလည်နိုင်တာပဲ ဖြစ်ပါတယ်။ ကျွန်တော်တို့ ပြည်တွင်းအနေအထားနဲ့ blogspot နဲ့ဆုံးတဲ့ ဘလော့တွေကို ဖတ်ရတာ မလွယ်ကူဘူး ဆိုတာ အားလုံးလဲ သိကြမှာပါ။ blogspot နဲ့ဆုံးပေမယ့် တကူးတက ကြီးကို သွားကောမန့်ပေးဖြစ်တဲ့ ဘ လော့ဆိုလို့ မနိုင်းနိုင်း ဘလော့တခုပဲ ရှိပါတယ်။ အများအားဖြင့် ကျွန်တော်ကတော့ ကြိုက်နှစ်သက်တဲ့ ဘလော့လေးတွေကို google reader မှာသာ ဖတ်လေ့ရှိပါတယ်။

တကယ်လို့ ကျွန်တော် လည်ဖြစ်ရင်လဲ အများအားဖြင့် လည်ဖြစ်တဲ့ ကောမန့်လဲ ပေးဖြစ်တဲ့ ဘလော့တွေကတော့ ကိုညီလင်းဆက်၊ မနိုင်းနိုင်း၊ မအိမ့်ချမ်းမြေ့၊ ကိုဂေါက်၊ မခွန်မြလှိုင်၊ မပန်၊ ကိုမိုးလှိုင်ည၊ ကိုရန်အောင်၊ ကိုမျက်လုံး၊ မောင်မျိုး စတဲ့ ဘလော့များပဲ ဖြစ်ကြပါတယ်။ သူတို့ကိုတော့ အပြင်မှာကော အွန်လိုင်းမှာလဲ ခင်နေလို့ သွားလည်ဖြစ်တာအပြင် သူတို့ ရေးတဲ့စာတွေကို သဘောကျလို့ သွားဖြစ်တာလဲ ပါပါတယ်။ ဒါဖြင့် ကျန်ဘလော့များက မကောင်းလို့လား ဆိုတော့ မဟုတ်ပါဘူး ကျွန်တော် အနေနဲ့ အဆက်အစပ် မဖြစ်တာပါ။ အများသော အားဖြင့် ကျွန်တော် အင်တာနက်သုံးရင် သတင်းတွေလိုက်ဖတ်၊ ၀ီကီတွေလိုက်ဖတ်၊ အလကားပဲတင်း ဆော့ဖ်ဝဲလေး တွေ ဒေါင်းလု ဆွဲရင်း (အရမ်းခင်တဲ့) သူငယ်ချင်းများနဲ့ ချက်လေ့ရှိပါတယ်။ ဒါကြောင့် သီးသန့်ကြီး လိုက် မလည် ဖြစ်တာပါ။ ကျွန်တော်သိသလောက် ကျွန်တော်တို့ဘလော့ စရေးတဲ့ အချိန် ၂၀၀၇ တုန်းကထက် အခုချိန်မှာ မြန်မာဘလော့ပေါင်းဟာ ထောင်ဂဏန်း ကျော်ခန့် ရှိနေပါပြီ။ ဒါတွေ အကုန်လုံးကို ကျွန်တော် မသိနိုင်ပါဘူး။ ကျွန်တော့်ဆီဗုံးမှာ လာအော်လို့ လင့်ခ်ချန်ထားခဲ့တယ် ဆိုရင်တော့ ကျွန်တော် သွားဖတ်ကြည့်တယ်။ ကြိုက်တယ်ဆိုရင်တော့ ကျွန်တော် google reader ထဲ ထည့်ထားလိုက်ပါတော့တယ်။

ကျွန်တော့် အကြောင်းလဲ အားလုံးသိတဲ့ အတိုင်း ကျွန်တော်ဟာ ခပ်ပျော်ပျော်သာ နေတတ်တဲ့ အတွက် ကျွန်တော့်မှာ ရန်သူ မရှိပါဘူး။ ကျွန်တော်အားလုံးကို ခင်တတ်ပါတယ် ခင်ဗျာ။ အွန်လိုင်းမှာကော အပြင်မှာ အခြေအနေပေးလို့ ဆုံတွေ့မိရင်ရော ကျွန်တော့် အကြောင်း သိသွားကြသူတွေချည်းပါပဲ။ ကျွန်တော့်ဘလော့ပို့စ်တွေမှာဆို ဘလော့ပေါ်မှ ရန်ဖြစ်ခြင်း၊ လျှောက်ဖွခြင်း စတဲ့ ပို့စ်များ ရှိမှာ မဟုတ်ပါဘူး။ ကျွန်တော် အားလုံးကို ခင်မင် လေးစားပါတယ်။ ကျွန်တော်ဟာ ဘလော့တခုပိုင်ဆိုင်လို့ ဘလော့ကာလို့ ပြောနိုင်ပေမယ့် ကျွန်တော် ဘာကောင်မှ မဟုတ်ပါဘူး။ ကျွန်တော် စာရေးဆရာလဲ မဟုတ်ပါဘူး၊ ကျွန်တော် သတင်းသမားလဲ မဟုတ်ပါဘူး၊ ကျွန်တော် ပါတီနိုင်ငံရေးသားကောင်လဲ မဟုတ်ပါဘူး၊ ကျွန်တော်ဟာ ဘယ်သူ့ရဲ့ ကျောထောက် နောက်ခံမှလဲ မဟုတ်ပါဘူး၊ ကျွန်တော်ဟာ သာမန် အိုင်တီပညာရပ်ကို လေ့လာလိုက်စားနေတဲ့ ၀ါသနာအရသာ စာရေးနေတဲ့ အညတရ လူငယ်တဦး သာဖြစ်ကြောင်း အသိပေးပါရစေ။

ပြီးတော့ ကျွန်တော့်ရဲ့ Hit counter ဟာ ယခုစာရေးတဲ့အချိန်အထိ 15455 ရှိပါပြီ။ ဒီ counter ကိုတပ်တာ ဘလော့လုပ်ပြီး ၇လအကြာမှ တပ်တာ ဖြစ်ပါတယ်။ တိတိပပ ပြောရရင် 2007 September မှ စတပ်တာပါ။ ကျွန်တော့် ခံယူချက်တခုကတော့ လူအရေအတွက် ထက် ကျွန်တော့်ဆီကို ခင်လို့မင်လို့ပဲဖြစ်ဖြစ် တခုတ်တရပဲ ဖြစ်ဖြစ် လာဖတ်တဲ့ စာရှုသူများကို တန်ဖိုးထားပါတယ်။ ဒီနှစ်တော့ နှစ်ချုပ်လူဝင်စာရင်းလေး လုပ်ကြည့်မယ် ဆိုပြီး စိတ်ကူးရတာနဲ့ google analytics စာရင်းလေးနဲ့ စစ်တမ်း ကောက်ကြည့်တဲ့ အခါ အောက်ပါအတိုင်း စာရင်းတွေ တွေ့ရတယ် ခင်ဗျ။


Download Link

Map Overlay
All Traffic Sources

တခုချင်းတင်ပြချင်ပေမယ့် စာရင်းဇယားတွေက များတော့ PDF နဲ့ ပဲ လင့်ခ်ချိတ်ထားတယ် ခင်ဗျ။ စိတ်ပါဝင်စား တယ်ဆိုရင်တော့ ဒေါင်းလုပ်ကာ ကြည့်ရှုသွားနိုင်ပါတယ် ခင်ဗျာ။ တနှစ်တာ အတွင်း ကျွန်တော့် ဘလော့ကို လူအ၀င်အထွက် စာရင်းများ၊ ဘယ်စာမျက်နှာများဆီကနေ ရောက်လာကြတယ်၊ google ကနေ ရှာဖွေပြီး ဘယ်နှယောက် ရောက်လာကြတယ်။ ဘယ်နိုင်ငံတွေက ကျွန်တော့်ဘလော့ကို အများဆုံး ကြည့်ကြတယ်ဆိုတာ တွေ့ရမှာ ဖြစ်ပါတယ်။ စာရင်းဇယားများ အရတော့ တကမ္ဘာလုံးက ကြည့်ကြတယ်လို့ ပြောတာပဲ။ ကြားဖူးသလိုလိုပဲ ဆိုတဲ့သူတွေလဲ ရှိမှာပါ။ လုံးဝမသိဘူးကွာ ဆိုသူတွေ ဒီကောင်က ဘာကောင်လဲ ဆိုတဲ့ သူတွေလဲ ရှိမှာပါ။ ဟားသိပ်သိတာပေါ့ ဒီကောင် သောက်ရူး ဆိုတဲ့ လူတွေလဲ ရှိမှာပါ။ လူအမျိုးမျိုးပေါ့ဗျာ ကျွန်တော့် ဘလော့က နာမည်ကြီးလား မကြီးဘူးလား ကျွန်တော် ကိုယ်တိုင်တောင် သေချာ မသိပါဘူး ခင်ဗျာ။ ဟုတ်ကဲ့ မင်းယွန်းသစ်ကို သိကြသလား ခင်ဗျာ။

Read Users' Comments (6)

တနှစ်ပြည့်သွားတဲ့ တိုလီမုတ်စ

Posted in Labels: , | Wednesday, March 05, 2008

ကျွန်တော် ခုရက်ပိုင်းဘာတွေ ရှုပ်နေမှန်း မသိဘူးဗျာ။ ကိုယ့်ဘလောက်ကလေး တစ်နှစ်ပြည့်သွားတာတောင် သတိမထားမိလိုက်ဘူး။ ဘာလိုလိုနဲ့ မတောက်တခေါက် ဘလောက်ရေးစားလာတာ တစ်နှစ်ပြည့်သွားပြီပေါ့လေ။ ကျွန်တော် မနှစ်က ဒီလိုချိန်မှာ မြန်မာလို ဘလောက်ရေးဖို့ ကြိုးစားနေဆဲပေါ့။ ကိုမောင်လှကြီးကို သွားမေးလိုက်။ လုပ်ကြည့်လိုက်နဲ့ အဆင်မပြေသေးတော့ ကျွန်တော်မြန်မာလို ပို့စ်ကို ဘယ်လိုတင်လဲ ဆိုတော့ ဖိုတိုရှော့ခ် ပေါ်မှာ ရေးပြီး ဓာတ်ပုံလိုက်ကြီး ကောက်တင်ပါတယ်။ ပြီးမှ စမ်းသပ်ရင်းနဲ့ မြန်မာလို ရေးတတ်လာပါတယ်။ ဒါပေမယ့် ပို့စ်တခုရေးဖို့ အတော့်ကို ကြိုးစားအားထုတ် ရပါတယ်။ ကျွန်တော်က မြန်မာလို လက်ကွက် ရင်းနှီးမှု မရှိသေးဘူးလေ။ ပြီးတော့ တန်းပလိပ်ကို ကလိတာ လွန်သွားလို့ ပြန်ပြင်ရပါသေးတယ်။ ပထမ လုပ်တုန်းက ၂၀၀၇ ဖေဖော်ဝါရီ လလယ်လောက် ကတည်းက လုပ်ထားတာပါ။ ဒါပေမယ့် တန်းပလိပ်ကို ကလိရင်း ဆိုက်ဘားတွေ ဘေးကားထွက်၊ စာလုံးတွေ ဘောင်ကျော်တာတွေကို မနည်းပြန်ပြင်ရင်း ပို့စ်ကို မတ်လလောက်မှ စတင်ဖြစ်ပါတယ်။ ဒီကြားထဲ အီးအိုတီကြီး စမ်းတာလဲ အဆင်မပြေဘူးဆိုတော့ ခွကျနေသေးတယ်လေ။ (မေးစရာလဲ ခုလို ပေါပေါများများမရှိသေးဘူးလေ)


ကျွန်တော် ဘလော့ဂ်ရေးရခြင်း ရည်ရွယ်ချက်သည် ကျွန်တော့် ရေးတတ်သော၊ ကျွန်တော် ၀ါသနာပါသော ကျွန်တော်၏ မတောက်တခေါက် စာပေ တိုစ များကို တင်ဖို့ပါပဲ။ ကျွန်တော် ခံစားမိသော အကြောင်းအရာများကို ရေးပါသည်။ ကျွန်တော် ပျော်လျှင် ကျွန်တော့် ဘလော့ဂ်လေးသည် ပျော်နေပါလိမ့်မည်။ ကျွန်တော် ၀မ်းနည်းလျှင် ဘလော့ဂ်လေးလဲ ၀မ်းနည်းနေပါလိမ့်မည်။ ကျွန်တော် ရည်းစားရလျှင် ဘလော့ဂ်လေးလဲ ချစ်တတ်နေပါလိမ့်မည်။ ကျွန်တော် အသဲကွဲလျှင်လဲ ကျွန်တော့်ဘလော့ဂ်လေးလဲ အသဲကွဲနေပါလိမ့်မည်။ ကျွန်တော့် ၏ ကိုယ်ပိုင်အိမ်လေးနဲ့ တူသော ကျွန်တော့် ဘလော့ဂ်လေးကို အလွန်တရာ မြတ်နိုးပါသည်။


တနေ့တနေ့ အွန်လိုင်းတက်ရင် ဆီဗုံးလေးကို ကြည့်ရတာလဲ အမောပင်ဖြစ်ပါသည်။ ကျွန်တော် တစ်ယောက်တည်း ရေးနေရာမှ ဆီမီနာလုပ်သောအခါ ဘယ်တုန်းကနဲ့မှ မတူတဲ့ ခင်မင်စရာ အလွန်ကောင်းတဲ့ ဘလော့ဂ်ကာ သူငယ်ချင်းများ ရခဲ့ပါတယ်။ ဒီလိုနဲ့ ကျွန်တော်သည် 'you'll never blog alone' ဖြစ်လာပါသည်။ မြန်မာ ဘလော့ဂ်ရပ်ဝန်းတွင် ပါဝင်ပတ်သက်လာရပါတယ်။ လွတ်လပ်ပွင့်လင်းသော အမြင်ရှိသော လူတန်းစား မခွဲခြားသော ဘလော့ဂ်ကာ သူငယ်ချင်းများနဲ့ ခင်မင်မှု ရတဲ့အတွက် ၀မ်းမြောက်မိပါတယ်။ ကျွန်တော် အစလုပ်တုန်းက ဒီလောက် တန်ဖိုးမထားပါဘူး။ ဒါပေမယ့် ကျွန်တော့်လို ပဲ တခြားဘလော့ဂ်ကာများနဲ့ ပေါင်းသင်းမိတဲ့အခါ ဒီရပ်ဝန်းလေးမှာ ပါဝင်နေမိရက်သားဖြစ်နေတဲ့ အတွက် ကျွန်တော့် ဘလော့ဂ်လေးကို တစတစ ခုံမင်မိလာပါတယ်။


ကျွန်တော် သည် ဘလော့ဂ်စွဲနေသော လူတစ်ယောက်ဟုတ်ပါသလားလို့ မေးရင် ဟုတ်ပါတယ်လို့ ပြောရပါလိမ့်မယ်။ ဘာလို့လဲ ဆိုတော့ ကျွန်တော် တခါတလေများအိပ်မက် ထဲမှာတောင် ပို့စ်တွေ ရေးနေမိတာပါ။ တနေ့တနေ့ ပို့စ်တခု ရေးဖို့ သွားရင်းလာရင်းတောင် စဉ်းစားနေမိတယ်လေ။ ဘလော့ဂ်ကာဆိုတာ citizen journalist တဖြစ်လဲ ပါပဲ။ ဘယ်သူတွေ ကျွန်တော်တို့ကို အသိအမှတ်ပြု ပြုမပြုပြု ကျွန်တော်ကတော့ ရေးနေအုံးမှာပါ။ ကျွန်တော် ရေးတဲ့ အကြောင်းအရာများဟာ ကျွန်တော့် ဘလော့ဂ်ခေါင်းစဉ်လိုပဲ တိုလီမုတ်စများပါပဲ။ တခါတလေ ကျွန်တော် ခံစားမိသော ကဗျာများရေးချင်ရေးသလို၊ တခါတလေလဲ ကျွန်တော် သွားလာနေထိုင်တဲ့ အကြောင်းအရာများကို ရေးချင်ရေးပါမယ်။ တခါတလေ ရန်ကုန်မှာ လက်ရှိဖြစ်ပျက်နေတဲ့ အကြောင်းအရာများ၊ သတင်းများကို ကျွန်တော် တင်ပြတတ်သလို တင်ပြချင် တင်ပြပါမယ်။ ကျွန်တော် အာမခံရဲပါတယ်။ ကျွန်တော် ဘလော့ဂ်ကာ တစ်ယောက်ဖြစ်ရတာ ဂုဏ်ယူမိတဲ့အတွက် ကျွန်တော် ဒီရပ်ဝန်းလေးထဲက ကျွန်တော် အသက်ရှင်နေသရွေ့ ကျောခိုင်းသွားမှာ မဟုတ်ပါဘူး။ ကျွန်တော်ရေးတတ်သလို ကျွန်တော် တင်ပြတတ်သလို ကျွန်တော်နေထိုင်ရာ ပတ်ဝန်းကျင် အကြောင်း၊ ကျွန်တော့် ပါစင်နယ် အတွေးအမြင် တွေ ကို တင်ပြနေအုံးမှာပါ။ ဘလော့ဂ်ရပ်ဝန်းကို နောက်မှ ရောက်လာသူများကိုလဲ ကြိုဆိုပါတယ်။ ကျွန်တော် ပြောလိုတာက ဒီနေ့ ဂလိုဘယ်လိုက်ဇေးရှင်း ခေတ်ကြီးထဲမှာ နည်းပညာအရာမှာ ကျွန်တော်တို့ မြန်မာတွေ တခြားနိုင်ငံတွေအောက် လုံးဝ မရောက်ပါဘူး။ ကျွန်တော် တို့တတ်စွမ်းသရွေ့ လုပ်နေကြအုံးမှာပါ။ ဘယ်သူတွေ ဘာပြောပြော ကျွန်တော်တို့ ကိုယ့်ယုံကြည်ချက်အတွက် လုပ်နေအုံးမှာပါ။ ကျွန်တော်တို့ ရှေ့ဆက် ဘလော့ဂ်.....ရေး....နေ....အုံး....မှာ....ပါ။

Read Users' Comments (3)

My Blog Story

Posted in Labels: | Friday, December 21, 2007

ဘလော့ဂ်ဆိုတဲ့ စကားလုံးကို စတင်ရင်းနှီးခဲ့တာ ၂၀၀၆ခုနှစ် နှစ်ကုန်ပိုင်းလောက်မှာပါ။ blog ဆိုတဲ့စကားလုံးကို ဟိုနားလဲတွေ့၊ ဒီနားလဲတွေ့ ဘာကြီးမှန်းမသိခဲ့ပါဘူး။ အီရတ်သတင်းနှင့် သက်ဆိုင်သော blog အားစာအုပ်အဖြစ် ထုတ်ဝေလိုက်သည်ဆိုသော သတင်းများ ဂျာနယ်တွေမှာ ပါလာသောအခါ၊ မြန်မာဘလော့ဂ် တချို့အကြောင်း နားစွံနားဖျားကြားလာသောအခါ ဘာမှန်းသိအောင် ရှာဖွေဖို့ဖြစ်လာခဲ့ပါတယ်။ ဟိုးအရင် ဘလော့ဂ်မရေးခင်တုန်းက ကျွန်တော်က ဖိုရမ်တစ်ချို့မှာ ဟိုရေးဒီရေးနဲ့ ၀င်ဝင်လက်ဆော့ နေတဲ့ကောင်ပေါ့။ :) ဒီလိုနဲ့ google မှာရှာရင်းဖွေရင်းနဲ့ မအိမ့်ချမ်းမြေ့ဘလော့ဂ် ကိုစတွေ့ခဲ့ပါတယ်။ အဲဒိတုန်းက ကျွန်တော်စဖတ်မိတဲ့ ဘလော့ဂ်သတင်းလေး တစ်ပုဒ်က အမေရိကန်ဟောလိဝုဒ် အော်စကာပေးပွဲ သတင်းဖြစ်ပါတယ်။ ပြီးတော့ နောက်ထပ်ရှာဖွေတွေ့ခဲ့တဲ့ ဘလော့ဂ်ကတော့ ကိုမောင်လှ ဘလော့ဂ်ကိုပါ။ ကိုမောင်လှရဲ့ ဘလော့ဂ်က ဘလော့ဂ်လုပ်နည်း၊ ဘလော့ဂ်ပေါ်မှာ မြန်မာလိုရေးနည်း လမ်းညွှန်ဖတ်ရင်းနဲ့မှ ကျွန်တော်ဆိုတဲ့ အူကြောင်ကျားဟာ blogger ကို google၏ ဆားဗစ်တစ်ခု ဖြစ်ကြောင်းသိပါတော့တယ်။ :P အဲဒိတော့မှ ဘလော့ဂ်လုပ်ဖို့ Register စမ်းလုပ်ကြည့်မိတော့တာပါပဲ။


ဘလော့ဂ်စလုပ်တုန်းက ကျွန်တော်အတုယူပြီး လုပ်ခဲ့တဲ့ ဘလော့ဂ်ဟာလဲ ကိုမောင်လှ ဘလော့ဂ်ပါပဲ။ ကိုမောင်လှ ဘလော့ဂ်ပေါ်မှာ တင်ထားတဲ့ အထူးသဖြင့် side bar ပေါ်မှာတင်ထားတဲ့ widgets တွေကို လိုက်ထည့်မိတာပါပဲ။ ပထမဆုံး cbox ထည့်တုန်းကဆို ကျွန်တော်ဆိုတဲ့ကောင်ဟာ cbox ကုဒ်တွေကို side bar မှာ ဘယ်လိုထည့်ရမှန်းမသိလို့ Edit Html ထဲမှာ သွားထည့်ခဲ့တယ်လေ။ ထားတဲ့နေရာ မမှန်တော့ တလွဲတွေ ဖြစ်နေတော့တာပါပဲ။ လုံးလည်ချာလည်လိုက်နေတာ cbox ကိုထည့်တာ တစ်ရက်လောက်ကြာသွားပါတယ်။ အဲဒိတုန်းက ဘလော့ဂ်လုပ်နည်းကို ဖော်ပြတဲ့ ဘလော့ဂ်ဆိုလို့ (ကျွန်တော်သိတာ) ကိုမောင်လှရယ်၊ နောက်တစ်ဦးက အင်္ဂလိပ်လိုရေးတဲ့ (ဘယ်သူမှန်းမမှတ်မိတော့) မြန်မာပရိုဂရမ်မာတစ်ယောက်ရဲ့ ဘလော့ဂ်ရယ် ဒီလောက်ပဲ သိတယ်။ မြန်မာလိုရေးချင်ရင် ပေါ်ချင်ရင် setting ထဲက formatting ထဲမှာ font tab တွေထည့်ရတယ်ဆိုလို့ ထည့်ပြီးစာရေးကြည့်ပါတယ်။ ပထမဆုံးစမ်းရေးတဲ့စာက ပထမအခေါက်နဲ့တင် အဆင်မပြေသေးလို့ ကိုမောင်လှကြီးဆီသွားပြီး ကောမန့်ထဲမှာ သွားသွားပြီး နားပူနားဆာ လုပ်ရတာပါပဲ။ နောက်ဆုံးမြန်မာလို ရေးဖို့ Text Editor လေး ရတော့မှ ကျွန်တော် မြန်မာလို ရေးရတာ အဆင်ပြေလာပါတော့တယ်။ (အဲဒိတုန်းက keyboard installer လဲမသိသေးဘူး) ။ အမှန်တော့ အဲဒိကတည်းက ကိုစေတန်ဂေါ့တ်လဲ ဘလော့ဂ်ရေးနေပါပြီ။ ဘာလို့လဲ ဆိုတော့ အဲဒိText Editor လေးဟာ ကိုစေတန်ဂေါ့တ် ရေးထားတာလေးပါ။


ကျွန်တော်စရေးတုန်းကဆို Text Editor ထဲမှာ အရင်ရေးပြီးမှ postingနေရာမှာ paste လုပ်ပါတယ်။ ပထမဆုံးရေးလို့ အဆင်ပြေတဲ့ ပို့စ်ကိုကိုယ်ဟာကိုယ်ပြန်ဖတ်ရင်း ပီတိတွေဖြစ်နေတာပေါ့။ ဒါပေမယ့် ခေါင်းစဉ်တွေက အဆင်မပြေသေးပါဘူး။ အဲဒါ eot ဆိုတာကြီး လိုက်လုပ်ကြည့်ပါသေးတယ်။ အဆင်မပြေပါဘူးဗျာ။ စားလုံးတွေ ကိုးယိုးကားယားနဲ့ Firefox မှာကြည့်ရင် အဆင်ပြေသလိုလိုနဲ့ IE မှာကျတော့ အဆင်မပြေပြန်ဘူး။ eot ကို ကလိရင်း ကလိရင်း အကြိမ်ကြိမ်ပြန်လုပ်ရင်းနဲ့ တစ်ပတ်လောက်ကြာတယ်။ လုံးဝအဆင်မပြေလို့ ပြန်ဖြုတ်လိုက်ရတယ်။ နောက်တော့မှ eot မထည့်ပဲ ရိုးရိုးလေး font variable တွေကို ကြေငြာပြီးပဲ ထည့်လိုက်တော့တယ်။ အဲဒိနောက်တော့ ကိုညီလင်းဆက်ဘလော့ဂ်၊ သူ့ရဲ့ မြန်မာဘလော့ဂ်လမ်းညွှန် ဘလော့ဂ် ကနေတဆင့် မနိုင်းနိုင်းဘလော့ဂ်ကို တွေ့ပါတယ်။ မနိုင်းရဲ့စာတွေကို အဲဒိထဲက ဖတ်မိရင်း သဘောကျမိတာပါ။ အဲ..အစတုန်းက ကျွန်တော်က မနိုင်းကို အကိုကြီးတစ်ယောက်ထင်ပြီး အကိုတွေ ဘာတွေ ဆီဗုံးမှာ သွားအော်ပါသေးတယ်။ :)
ဘလော့ဂ်စလုပ်ကတည်းက ရည်ရွယ်ချက်က ဘလော့ဂ်ကိုကလိဖို့နဲ့ ကျွန်တော့်ကတောက်တစ်ခေါက် ရေးထားတဲ့ စာတွေကိုတင်ချင်လို့ပါပဲ။ အိမ်မှာဆို စာအုပ်ထဲရေး၊ ဟိုစာရွက်ထဲရေးထားတဲ့ ပရမ်းပတာ ပြန့်ကျဲနေတဲ့ စာတွေ၊ကဗျာတွေကို တစုတစည်းထဲဖြစ်အောင် စတင်ဖြစ်ခဲ့ပါတယ်။ ကိုယ့်ဟာကိုယ်ရေး ကိုယ့်ဟာကိုယ်ဖတ် သဘောတွေစွတ်ကျနေတော့တာပါပဲ။ တနေ့တနေ့ဘလော့ဂ်လေးပေါ်မှာ ဘာတင်ရမလဲလို့ စဉ်းစားနေမိတာကို အရသာတွေ့မိပါတယ်။ အဲဒီမှာ ဘလော့ဂ်စွဲခြင်းရောဂါ စပါတော့တယ်။:)
အဲဒီတုန်းက ဘလော့ဂ်တွေလဲ ဒီလောက်မပေါများသေးပါဘူး။ နောက်တော့ကျွန်တော်လဲ လက်လှမ်းမှီရာ ဘလော့ဂ်တစ်ခုမှတစ်ခု လိုက်ဖတ်ရင်း ဘလော့ဂ်ရီဒါတစ်ပိုင်းလည်းလုပ်ပါတယ်။ အဲဒီတုန်းက ကျွန်တော်တို့ဘလော့ဂ်တွေကို ပင်တိုင်လိုက်ဖတ်လေ့ရှိတဲ့ ဘလော့ဂ်ရီဒါစစ်စစ်ကြီးကတော့ ကျွန်တော့်အစ်မ ဒီမိုပါပဲ။ နောက်တော့ လည်ရင်းပတ်ရင်း ကိုရန်အောင်၊ မမီ၊ လွတ်ကျခဲ့သူကြီး၊ မမဘာညာ၊ ကိုဂေါက်တို့ ဘလော့ဂ်တွေကို ရောက်ဖြစ်လာပါတယ်။ အရင် အစပိုင်းကတည်းက သူတို့တွေက online ရော offline ပါ တွေ့နေကြပြီလေ။


ကျွန်တော်ဘလော့လေးကို စပြီးလုပ်တုန်းက ဖေဖော်ဝါရီလက စပေမယ့် ပို့စ်တင်တော့ မတ်လလောက်မှတင်ဖြစ်ပါတယ်။ ပြီးတော့ hit counter လဲ တော်တော်လေးနောက်ကျမှတပ်ဖြစ်ခဲ့တယ်။ မှတ်မိသလောက်ဆို သြဂုတ်လဆန်းလောက်မှ တပ်ဖြစ်ခဲ့တာပါ။ ကျွန်တော့် အယူအဆက အရေအတွက်ထက် ကျွန်တော့်ဆီကို ခင်လို့ မင်လို့၊ ကျွန်တော့်စာ၊ ကဗျာတွေကို တမင်သက်သက်ဖြစ်ဖြစ် လမ်းကြုံလို့ပဲဖြစ်ဖြစ် လာဖတ်တဲ့သူတိုင်းဟာ ကျွန်တော့်အတွက် ခွန်အားတွေပါပဲ။ အရေအတွက်ဆိုတာ လုပ်ယူလို့ရပါတယ်။ ဒါပေမယ့် ခင်မင်မှုနဲ့ တန်ဖိုးထားမှုတွေဟာ တော့ လုပ်ယူလို့ မရပါဘူးဆိုတာပါပဲ။ ကျွန်တော်အရင်က တစ်ယောက်ထဲ အထီးကျန်စွာ ရေးနေရင်းက ဟိုလည်ဒီလည်နဲ့ အပေါင်းအသင်းတွေ ရလာတော့ ကျွန်တော်ဒီရပ်ဝန်းလေးမှာနေထိုင်ရတာ ပျော်လာတယ်။ ကျွန်တော့်အတွက် ပိုကောင်းခဲ့တဲ့ အခွင့်အရေးတစ်ခုက ဘလော့ဂ်ဆီမီနာ လုပ်ဖြစ်လိုက်ကြတာဟာ ကျွန်တော်ခင်တဲ့၊ ကျွန်တော် ဖတ်လေ့ရှိတဲ့ ဘလော့ဂ်တွေရဲ့ ပိုင်ရှင် ဘလော့ဂ်ကာတွေကို အပြင်မှာ မျက်ဝါးထင်ထင်တွေ့ခွင့်ရခဲ့သလို၊ ခင်မင်ခွင့်ရခဲ့တာပါပဲ။ တကယ်ပေါင်းကြည့်တော့မှ တကယ့်ကို စိတ်တူကိုယ်တူဖြစ်ပြီး Level အဆင့်အတန်း မခွဲတဲ့ ၊ အသက်အရွယ်မခွဲတတ်တဲ့ သူငယ်ချင်းကောင်းများကို ရလိုက်တာပါပဲ။ တကယ်ပါ ကျွန်တော် ဒီဘလော့ရပ်ဝန်းလေးမှာနေရတာ သက်သောင့်သက်သာရှိပြီး နွေးထွေးမှုရှိပါတယ်။ လွတ်လပ်မှုလဲရှိပါတယ်။ ကျွန်တော့် ဘလော့ဂ်လေးကို စွဲလမ်းလမ်းဖြစ်သလို မြန်မာဘလော့ဂ်လောကလေးကိုလဲ စွဲလမ်းနှစ်ခြိုက်ခုံမင် နေမိပါပြီ။ ကဲ..သယ်ရင်းတို့ရော….

(အဟဲ ကိုပီကေ တက်ထားတဲ့ ပို့စ်လေး အပျင်းကြီးပြီးခုမှ ရေးဖြစ်ပါတယ်…:P)

Read Users' Comments (6)

ဘာကြောင့်ဘလော့ဂ်ရတယ်

Posted in Labels: | Friday, August 31, 2007

ကျွန်တော်ဘာကြောင့်ဘလော့ဂ်ရလဲဆိုတာ ရေးတာ သုံးကြိမ်လောက်ရှိပါပြီ။ ဒါပေမယ့် ဒီနေ့ဟာ ဘလော့ဂ်ဒေး ဖြစ်လို့ အမှတ်တရ ပြန်ရေးပါမယ်။ ကြားချင်ရင် နားဆင်တော်မူကြပါ ခင်ဗျာ။

ပထမဦးဆုံးကျွန်တော် ဘာလို့ ဘလော့ဂ်ရလဲဆိုတာ ဒီလိုဗျ။ အစက ကျွန်တော် က အင်တာနက် ကို အူလည်လည် သုံးနေတဲ့ ကောင်ပါ။ (အခု လဲ ထူးသေးဘူး ထင်တာပဲ။ ဒါပေမယ့် နဲနဲတော့ ထူးလာတယ်။ ရူးပါရူးလာသလိုပဲ ဟိ။ ) ကျွန်တော် က ဘလော့ဂ်ကို ကြားနေရတာ ကြာပြီ ။ ဂျာနယ်ထဲမှာ ။ တခါတလေ ဂူဂဲလ် (google) မှာ ရှာချင်တာ တချို့ ရှာရင်း နဲ့ ဘလော့ဂ်ဆိုက်တွေကို ရောက်ရောက်သွားတယ်။ ကျွန်တော် သတိထားမိတာ ဘလော့ဂ်လိုဂို ပုံလေးရယ်။ ၀က်ဘ်ဆိုက်နဲ့ ပုံစံနဲနဲကွဲ တဲ့ ဘလော့ဂ် အခင်းအကျင်းရယ်။ ပြီးတော့ ကျွန်တော် ဂူဂဲလ် ရဲ့ တခြား function တွေ ကြည့်ရင်းနဲ့ ဘလော့ဂ်ဆိုတာ သွားတွေ့တယ်။ ဟား ကြည့်စမ်း ဒီမှာ လုပ်လို့ရတာပဲ ဆိုပြီး ဘလော့ဂ်လုပ်လိုက်တယ်။ ပထမ တုန်းက ကျွန်တော် ဘလော့ဂ်လေးဖြစ်လာတယ်။ ဘာရေးရမှန်း သိဘူး။ ဘိုလို တတ်သလောက် လေး အက်ဆေးလိုလို ဘာလိုလို ရေးတယ်ဗျ။ (ဘိုလို ဆိုတော့ ဘာမှ မဟုတ်ပါဘူး။ ဆယ်တန်း အက်ဆေး လောက် သာသာ သာ ရှိတာပါ။ အဟိ တော်ပုံများ ပြောပါတယ်။ ရေးရတာ အားမရဘူးဗျာ။ ကျွန်တော် ဒီလိုနဲ့ ရှာရင်း ဖွေရင်း ကိုမောင်လှကို သွားတွေ့တယ်။ အဲလေ ကိုမောင်လှ ဘလော့ဂ်ကို ပြောတာပါ။ မြန်မာလို သူရေးထားတော့ ဟ တယ်ဟုတ်ပါလား။ ဆိုပြီး စိတ်ဝင်စားသွားတယ်ဗျ။ ဒါနဲ့ source ဖိုင် ကို ဖွင့် coding ကူးထည့်။ ပေါ်တင်ယူတာ။ ရဘူးဗျာ။ အဲဒါနဲ့ သူဆီပြန်သွား။ အော် ကျွန်တော် မျက်စိရှန်းသွားလို့ဗျာ။ သူက မြန်မာလို ဘယ်လိုရေးရတယ် ဆိုတာ ပြောထား သဗျ။ ဒီလိုနဲ့ အိုကေသွားတယ်ဆိုပါတော့ ။ ဒါပေမယ့် ခေါင်းစဉ် ပြသနာ က ရှိသေးတယ် မြန်မာလို မပေါ်ဘူး။ အဲဒါနဲ့ EOT ဆိုတာကြီးလုပ်ကြည့်တယ်။ အားပါး ရပါဘူးဗျာ။ စာလုံးတွေ အတုံးကြီးတွေ ဖြစ်။ အလွဲလွဲ အမှားမှားတွေ ဖြစ်။ စိတ်ညစ်သွားတယ်။ အဲရေးတော့ ရေးနေတာပဲ ဘလော့ဂ်က ပုံမကျ ပန်းမကျ ဒုက္ခိတလေးဖြစ်နေတယ်။ ဒီလိုနဲ့ ကိုညီလင်းဆက်၊ နဲ့ တဆင့်တဆင့် ကနေ တခြား ဘလော့ဂ်ဂါ တွေဆီ ရောက်ဖြစ်သွားတယ်။ အဲဒိမှာ ဘယ်သူဟာ မှန်းမမှတ်တော့ မမှတ်မိတော့ဘူး။ မြန်မာလို ရိုးရိုးလေး ကြော်ငြာလို့ ရမှန်းသိတော့မှ အိုကေသွားတယ်။ အော်အော် ဒါက ကျွန်တော့် ဘလော့ဂ်ဖြစ်လာပုံပဲ။ ရည်ရွယ်ချက်တောင် ပျောက်သွားတယ်။ ဆောရီး။ ကျွန်တော် ဆိုတဲ့ကောင်က စာရူးပေရူးကောင်ပါ။ ၉တန်း ၁၀ တန်းလောက် တုန်းက ၀ါသနာ တူတဲ့ သူငယ်ချင်းတွေ စုမိရာ က ပိုးစတော့တာပဲ။ ကဗျာတွေ ရေး။ စာတိုပေစ တွေရေး။ university ပထမနှစ်တုန်းက ဆို ကဗျာ စာအုပ်ထွက် ဖူးတယ်။ ဒီလောက်ပဲ။ ကျန်တာ ကိုယ့်ဖာသာ ကိုယ် ရေးပြီး သိမ်းထားတာပဲ။ ကျွန်တော်က ကိုယ့်ဖာကိုယ် အားမနာတမ်း ပြောရရင် စည်းကမ်း ရှိတဲ့ကောင်မဟုတ်ဘူး။ ကျွန်တော် ရေးဖို့ စိတ်ကူးပေါ်လာပြီဆိုတာနဲ့ ကျွန်တော့် နားက ရှိတဲ့ စာအုပ်လေးတွေ မှာ ပွစိကျဲအောင် လျှောက်ရေးတော့တာပဲ။ ပြီးရင် ဘယ်နားရေးမိမှန်းမသိ ရှာရပြီ။ အဲဒါ ဘလော့ဂ်မရေးခင်လေးအထိပါပဲ။ အဲအခု တော့ ဘလော့ဂ် လုပ်လို့ ရလာပြီဆိုတော့ ကျွန်တော့် စာလေးတွေကို စည်းကမ်းတကျ ဘလော့ဂ်ပေါ်တင်ထားလို့ ရပြီ။ ပျောက်မှာ မစိုးရိမ်ရတော့ဘူး။ နောက်တော့ ကျွန်တော့်ဟာ ကျွန်တော် ပြန်ဖတ်ရင်း သဘောကျရသလို။ ကျွန်တော့် ဘလော့ဂ်ကို လာလည်တဲ့ စာဖတ်သူတွေ နဲ့ လည်း ထိတွေ့ မှုရှိတယ်။ မှတ်ချက်လေးတွေ လည်း ရနိုင်တယ်။ ကျွန်တော့် အနုပညာတွေ အားလုံးနဲ့ share လို့ရတယ်။ ဝေဖန်မှုတွေရ တယ်။ ချီးမွှမ်းမှုတွေ ရတယ်။ အရင်ကလို ကျွန်တော် တစ်ယောက်ထဲ ကြိတ်ပြီး ကိုယ့်ဘာသာကိုယ် ဖတ်နေစရာ လိုတော့ဘူး။ ဖတ်ပါ။ ဖတ်ပါလို့ ကျွန်တော့် စာတွေကို လိုက်ဖတ်ခိုင်းစရာ လိုတော့ဘူးပေါ့ဗျာ။ ကျွန်တော်က ဘလော့ဂ်ရေးရင်း သူငယ်ချင်းတွေရဲ့ ဘလော့ဂ်လေးတွေကို လိုက်ကြည့်တတ်တဲ့ blog reader လဲ လုပ်တယ်ဗျ။ ဘလော့ဂ်ပေါ်မှာ ရေးကြတဲ့ သူတွေ က ပွင့်လင်းလွတ်လပ်တဲ့ စိတ်ဓာတ်လေးတွေ အများအားဖြင့် ရှိတတ်ကြတယ်။ ကျွန်တော်က ဒါကို သဘောကျတယ်။ ကျွန်တော် ဘလော့ဂ်ရင်း ဘလော့ဂ်ရင်း နဲ့ ဘလော့ဂ်လေးတွေကို ခင်တွယ်လာတယ်။ ဘလော့ဂ်ဂါ သူငယ်ချင်းတွေကို လဲ ချစ်ခင်တတ်လာတယ်။ တကယ်ပါ ဘလော့ဂ်ဂါ ရပ်ဝန်းလေး မှာ နေထိုင် ရတာ ကျေနပ်စရာပါ။ အဆုံးသတ်အနေနဲ့ ကျွန်တော်ဘာလို့ ဘလော့ဂ်ရလဲ ဆိုတော့ ကျွန်တော့် အနုပညာတွေ ခင်းကျင်းပြချင်တယ်။ ကျွန်တော့် အိပ်မက်တွေ ဝေမျှပေးချင်တယ်။ သဘောထားချင်း တိုက်ဆိုင်တာ ရှိနိုင်သလို မတိုက်ဆိုင် တာလဲ ရှိနိုင်တယ်။ ဒါပေမယ့် အဓိက က ကျွန်တော့် စာတွေပေါ်ဝေဖန်မှုလေးတွေ လိုချင်တယ်။ ထို့ အတူ ချီးမွှမ်းသံလေးတွေ လဲ ကြားချင်တယ်။ ဒါကြောင့် ကျွန်တော် ဘလော့ဂ်တယ်။ ကျွန်တော် သိသမျှလေးတွေ ဝေမျှသွားချင်တယ်။ ဒိထက်လဲ တိုးတက်အောင် ကြိုးစားအုံးမယ်။ အခုလဲ ဘလော့ဂ်မယ် နောင်လဲ ဘလော့ဂ်မယ်။ ဘလော့ဂ်ကြီး ရှင်သန်နေ သရွေ့ ပေါ့ဗျာ။

Read Users' Comments (0)

Subscribe to: Posts (Atom)