ဆူညံခြင်း
ကျွန်တော်အဖြစ်က နှစ်တိုင်းဝါ၀င်မှာကို ကြောက်နေတယ်။ ၀ါဝင်မှာကို ဘာလို့ကြောက်ရလဲ ဆိုတာရှင်းပြရရင် ကျွန်တော်တို့ ရပ်ကွက်ဓမ္မာရုံဟာ ကျွန်တော့်အိမ်နဲ့ သုံးခြံကျော် မျက်စောင်းထိုးမှာ ရှိပါတယ်။ အဲ..အခုပြောမယ့် ပြဿနာက အဲဒိဓမ္မာရုံပါပဲ။ ပြီးခဲ့တဲ့နှစ် ၀ါတွင်းမှာမှ ရပ်ကွက်ဓမ္မာရုံ လူကြီး အသစ်ပြောင်းတယ်။ ပြောင်းရတဲ့ အကြောင်းအရင်းက လူကြီးအဟောင်းက စာရင်းတွေနှစ်ချုပ်တော့ သိန်းနဲ့ချီငွေတွေ ကွာနေလို့။ ခပ်ရှင်းရှင်း ပြောရရင် ရပ်ကွက်က ဓမ္မာရုံအတွက် သဒ္ဓါလို့ လှူထားတဲ့ ငွေတွေကို ဘုံးလိုက်တယ်ပေါ့ဗျာ။ (အင်း..ပြောတော့ ဘုရားဘုရား.. လုပ်တော့...... ဆိုတာပေါ့)
အဲ့ဒိလူကြီးဟောင်းတုန်းကဆို သူက မိုက်ခဲဗျ။ အဟတ် မိုက်ခဲဆိုတာ မိုက်ကို ခဲတာ။ ဥပုသ်နေ့ ရောက်ပဟေ့ဆို ဇာတ်တော်ကြီးတွေ၊ ဘုရား ဇာတ်ထုပ်တွေ ဌာန်ကရိုဏ်းနဲ့ကို ဟောနေတာ။ တခါတလေ ဥပုသ်နေ့ ဘုန်းကြီးတောင် မပင့်ပဲ ယောဂီတွေကို သူကိုယ်တိုင် တက်ဟောနေတာ..။ တောဘုန်းကြီးကျောင်းထွက် ပင်စင်စား ဆိုပါတော့။ ဒီလိုဟောလို့ ပြီးပြီလားဟေ့ဆို မပြီးသေးဘူး။ အမေနဲ့ ရွာကို လွမ်းတယ်တို့၊ မွေးမေ ကျေးဇူးဆပ်ဖူးချင်တယ်တို့၊ ဟင်္သာတထွန်းရင် သီချင်း၊ တွံတေးသိန်းတန် သီချင်းတွေ ဖွင့်တော့တာပါပဲ။ သူ့ဟာသူ ပြောဟော ဖွင့်တာ မပြောလိုပါဘူး။ ဒါပေမယ့် ကိစ္စရှိတာက လော်စပီကာကို နင်းကန်အသံအဆုံးထိ ချဲ့ပြီး ဖွင့်ထားတာပါပဲ။
အဲ ..နောက်ကိစ္စတခုကတော့ အဲဒိဓမ္မာရုံက လော်စပီကာကြီးရဲ့ ဦးတည်ရာဟာ ကျွန်တော့် အပေါ်ထပ် အိပ်ခန်းတည့်တည့်ကြီးဖြစ်နေလို့ပါပဲ။ ဘုန်းကြီးတရားဟောတဲ့ အချိန်ဆို မပြောပါဘူး တရားဓမ္မသံဆိုတာ အဲလောက်ကြီး ကျယ်လောင်နေတာ မဟုတ်ဘူး။ ကိုယ်တောင် အိမ်မှာနေရင်း တရားနာလို့ ရသေးတယ်။ ဒါပေမယ့် သူ့ဟာက အလိုက်ကန်းဆိုးမသိ မနက်လင်းအားကြီး ၄နာရီလောက်ထဲက ထဖွင့်တော့တာပါပဲ။ ပြီးတော့ အသံအဆုံးဖွင့်ထားတော့ တဂွီဂွီ တဂေါ်ဂေါ်နဲ့။ လော်စပီကာက တေးသံတွေဟာ ခေါမတပ်ကြီး ချီတက်လာသလို တဝေါဝေါ တသောသောနဲ့ အသံဗလံတွေ စုပြုံပြီး ထွက်နေတာပါပဲ။
သူအလုပ်ပြုတ်သွားတော့ နောက်အသစ်ပြောင်းလာတော့ ၀မ်းသာရမလား အောက်မေ့တယ်။ ကျားကြောက်လို့ ရှင်ကြီးကိုး ရှင်ကြီးကျားထက်ဆိုး ဖြစ်နေတယ်။ဒီဘိုးတော်က ပိုဆိုး။ မနက် ၃နာရီလောက်ကြီး “ဘွန်န္တော...” ကနေ အစချီပြီး သီချင်းတွေ လျှောက်ဖွင့်တော့တာပဲ။ ဆွမ်းထချက်မယ့်သူတွေကို နှိုးဆော်တာတဲ့။ ကျွန်တော့် အမြင်ပြောရရင် တကယ်ကိုယ်လှူချင်တန်းချင်လို့ သဒ္ဓါလို့ ဆွမ်းထချက်မယ့် မည်သူမဆို နှိုးစရာတောင် မလိုပါဘူး။ သူ့ဟာသူ ၀ီရိယရှိပြီးသား။ သူက အဲ့လိုဖွင့်တော့ မနက်လင်းအားကြီးကြီးမှာ လန့်ဖျတ်နိုးလာပြီး ကျီးကျီးကြောင်ကြောင် ဖြစ်ကုန်ရော။ ကိုယ်က သွားပြောပြန်ရင်လဲ ကုသိုလ်ရေး ဆိုတာကြီးနဲ့ ကိုင်ပေါက်အုံးမယ်။ ဒါတင်ပဲလား ဆိုတော့ နေ့ခင်းနေ့လည်လဲ ကျွန်တော်အိမ်အပါအ၀င်၊ အိမ်နားက လူကြီးသူမတွေလဲ အိပ်မရပါဘူး။ သီချင်းသံတွေ ဆူညံနေအောင် ဖွင့်တော့တာပဲ။
ဆိုလိုတာ ကုသိုလ်ရေး ဓမ္မလုပ်နေတာ မဟုတ်တော့ဘူး လို့မြင်တယ်။ အဓမ္မဖြစ်နေပြီ။ ၀ါတွင်း ဥပုသ်နဲ့ ဥပုသ်အကြို ရက်တွေဆို မနက်တည်းက ဖွင့်လိုက်တာ ညနေစောင်းမှပဲ တိတ်တော့တယ်။ မနက်လင်းအားကြီး ဘုရားတောင် ၀တ်ပြုဖို့ အာရုံမရပါဘူး။ တော်ရုံမဟုတ်ဘူး။ ပြီးတော့ တခြား ရပ်ကွက် ဓမ္မာရုံတွေ မဖွင့်ဘူး မဟုတ်ဘူး ဖွင့်ကြပါတယ်။ ဒါပေမယ့် ရပ်ကွက် ကြားရုံလောက်ဆိုတော်ပြီပေါ့။ နင်းကန် အသံဆုံး ဖွင့်စရာ မလိုပါဘူး။ အော် ဓမ္မတေးသံလေး ဘာလေးကြားတော့ ကုသိုလ်စိတ်တွေ တဖွားဖွားဖြစ်ပေါ်လာရမယ့်ဟာ။ ခုတော့ စိတ်အနှောင့်အယှက်ဖြစ်လို့ အကုသိုလ်ဖြစ်နေရပြီ ပေါ့ဗျာ။ တခါလေတော့ စဉ်းစားတယ် ဒီလော်စပီကာ ကြီး အစား ဆောင်းဘောက်စ် သွားလှူရင်ကောင်းမလားလို့။ ဒါပေမယ့် စဉ်းစားကြည့်တော့ ဒီလို လော်စပီကာနဲ့တောင် ဒီလောက်ဖွင့်နေတာ ဘောက်စ်နဲ့ဆို တမြို့နယ်လုံးကြားအောင် ဖွင့်မလားပဲ။ ပြီးတော့ ဓမ္မာရုံက ဓမ္မာရုံနဲ့ မတူဘူး။ သူကလွဲလို့ တခြားလူတွေ ဓမ္မာရုံ ကိစ္စ ကြီးကြပ်တာလဲ မကြိုက်ဘူး။ ဘယ်လောက်တောင်လဲ ဆိုတော့ ဥပုသ်နေ့ကလွဲလို့ တခြားရက်တွေဆို ဓမ္မာရုံကို သော့ခတ် ထားသဗျ။ ဒါက ထားပါတော့ အခုဟာက လော်စပီကာသံကြောင့် ဓမ္မာရုံ အနီးအနားက အိမ်တွေဟာ ဥပုသ်နေ့နား ရောက်မှာကို ကြောက်နေရတယ်။ ရပ်ကွက်ဆိုတာ လူအများနဲ့နေတာ။ သင့်တော် မလား မသင့်တော်ဘူးလား မစဉ်းစားဘူး။ ဟူး မကျေနပ်တာ ပြောရရင်တော့ တပုံကြီးပဲ။ လောလောဆယ် ၀ါမြန်မြန်ထွက်ပါစေလို့သာ....ဆုတောင်းနေမိပါတော့တယ်ဗျာ။
ဤဘလော့မှ စာသားများ၊ ရုပ်ပုံများအား စီးပွားရေး ဆိုင်ရာ လုပ်ငန်းများတွင် ကူးယူသုံးစွဲခြင်းမပြုလုပ်ပါရန် (အထူး) သတိပေး တားမြစ်အပ်ပါသည်။
0 Response to "ဆူညံခြင်း"
Post a Comment